Outstanding woman 2007

Zelma "Yùfrou Chèma" Maduro honrá
ku 2007 'Outstanding Woman Award"


Willemstad - Zelma "Yùfrou Chèma” Maduro a keda honra djabièrnè último ku e rekonosementu ‘Outstanding Woman Award’. Tabata di dos biaha ku a entregaa e rekonosementu aki den kuadro di e konferenshanan anual pa hende muhé na Kòrsou. Durante di konferensha 2006 a entregá e promé ‘Outstanding Woman Award’ na Nilda Juliana kende durante di mas ku dos dékada a logra ku su empresa ‘Servisio Na Bo Òrdu’ pa duna hende muhé trabou, abriendo oportunidat pa e hende muhé ku ke traha i gana su pan di kada dia.
A skohe pa duna e rekonosementu di 2007 na Zelma "Yùfrou Chèma” Maduro kende a traha 52 aña den skolnan preparatorio na Kòrsou, siñando míles di mucha pa nan traha riba nan futuro. 

E ‘Outstanding Woman Award’ ta un sapatu hilchi haltu punta fini dilanti meskos ku tin den e logo di e konferenshanan anual 'About Women and....'.
E sapatu aki simbólikamente ta duna oportunidat na hende muhé pa kita tur estorbo ku nan topa den nan kaminda i ku lo por stroba nan karera profeshonal. Esnan ku haña e rekonosementu aki a duna muestra ku nan a surpasá bareranan visibel i no visibel ku a benefisiá tambe otro hende muhé. Ta bai sigui duna e rekonosementu aki den futuro na hende muhé riba 60 aña di edat di den Karibe pero preferiblemente den Antia (Kòrsou) kendenan sin masha publisidat por prueba ku nan a traha realmente na desaroyo i empoderamentu di hende muhé. Di e forma aki tambe ta rekonosé un hende muhé ku a logra mérito profeshonal i por presente komo role-model na profeshonalnan hóben. 

Pa mas informashon riba e Outstanding Woman Award por tuma kontakto ku BISInc na 767-9255. Riba e potrèt por mira:
1. Momentu ku esnan presente na e konferensha anual 'About Women and Power' tabata aploudí Zelma "Yùfrou Chèma” Maduro
2. Zelma "Yùfrou Chèma” Maduro rondoná pa oradónan i organisadó di e konferensha anual pa hende muhé About Women and Power.